Монгол улсын ерөнхийлөгч Ухнаагийн Хүрэлсүхийн ивээл дор зохион байгуулсан олон улсын монголч эрдэмтний XIII их хурлыг дэлхийн монгол судлалын төв Улаанбаатар хотноо 2026 оны 8 дугаар сарын 10-13-ны өдрүүдэд амжилттай зохион байгуулав.

Монголч эрдэмтдийн их хурлыг анх 1959 онд зохион байгуулахад 15 орны эрдэмтэн судлаачид 1 салбар хуралдаанаар 34 илтгэлийг хэлэлцүүлж байсан бол энэ жил 6 салбарын, 13 салбар хуралдаанаар 526 илтгэлийг хэлэлцүүлэн чуулжээ.

Энэхүү их хурал нь 66 жилийн хугацаанд тогтвортой хуралдаж, түүхэндээ 60 гаруй орны 3500 гаруй илтгэлийг хэлцсэн бөгөөд эдүгээ дэлхийн монгол судлалын салбарын хамгийн өргөн, нэр хүндтэй эрдэм шинжилгээний чуулган болж, өргөжин хөгжсөөр байна.

Энэ удаагийн олон улсын Монголч эрдэмтний XIII их хуралд манай ОУУБИС-аас 5 эрдэмтэн оролцож, судалгааны үр дүнгээ амжилттай хэлэлцүүллээ. Үүнд:

• Чингис хаан хүрээлэнгийн захирал, МУ-ын ШУ-ны гавьяат зүтгэлтэн, ШУ-ны доктор, профессор Балдандоржийн Сумьяабаатар “ ‘Тэнгэрийн хөвүүн’ гэдэг хэллэг монгол гаралтай болох нь” сэдвээр, 
• Чингис хаан хүрээлэнгийн эрдэмтэн, МУ-ын Төрийн соёрхолт, ШУ-ны гавьяат зүтгэлтэн, ШУ-ны доктор, профессор Цэвэлийн Шагдарсүрэн “Ширээт гүүш Цоржийн ‘Dri Med Kun lDan’ судрын монгол орчуулга” сэдвээр, 
• Суурь боловсролын тэнхимийн багш, доктор (Ph.D), дэд профессор Гомбын Гэрэлмаа “Таван хошуу малын талаарх монгол үнэлэмжийн ерөнхий тогтолцоо (зүйр цэцэн үг, оньсогын жишээгээр)” сэдвээр, 
• Хүмүүнлэг, нийгмийн ухааны сургуулийн захирал, доктор (Ph.D), дэд профессор Ким Ын Жон, Дотоод хяналт, стратегийн албаны дарга, доктор (Ph.D), дэд профессор Дашзэвэгийн Болормаа нар “Монгол ба солонгос хэлний ‘хөх/цэнхэр’ өнгө заасан хэллэгийн танин мэдэхүйн утга зүйн харьцуулсан судалгаа” сэдвээр тус тус илтгэлээ амжилттай хэлэлцүүллээ.

Эдгээр эрдэмтэн багш нартаа баяр хүргэн, цаашдын эрдэм судалгааны ажилд нь өндөр амжилт хүсье.