ОУУБИС-ийн ЭЗБС-ийн эрдмийн хамт олон, манай сургуулийн түүхийн он жилүүдэд хамт ажиллаж байсан эрдэмтэн багш нар, үе үеийн төгсөгчид, өнөөгийн суралцагч оюутнууд, хамтран ажиллагч байгууллага болон хувь хүмүүс, манай сайтаар зочилсон та бүхний энэ өдрийн амар амгаланг эрж, мэндчилж байна. ОУУБИС-ийн ЭЗБС-ийн эхлэл суурь нь 1996 оны 3-р сард Бизнесийн Удирдлагын Тэнхим анх байгуулагдсанаар тавигдсан бөгөөд одоогоор манай салбар сургуулийн хувьд Бизнесийн Удирдлагын тэнхим, Аялал жуулчлалын тэнхим, Эдийн засгийн тэнхим гэсэн 3 тэнхимтэй болж өргөжин, мэргэжлийн 15 эрдэмтэн багштайгаар дээд боловсролын үйлчилгээг тохилог, тааламжтай орчинд үзүүлж буйгаа дуулгахад таатай байна. ОУУБИС-ийн ЭЗБС нь Монгол Улсын дээд боловсролын салбарт чанартай, чадварлаг мэргэжилтэн бэлтгэх хариуцлагатай үүргээ өдөр тутамын үйл ажиллагаандаа ухамсарлан, суралцагчдаа тогтмол хөгжүүлэхийн төлөө чармайн ажиллаж, хувь хүний хөгжил ба хүнлэг зан чанарыг төлөвшүүлэхэд анхаарал хандуулдаг уламжлалтай. Манай сургуулийн хамт олон бүх нийтээр итгэл, найдвар, хайр гэсэн уриаг сургуулийн орчинд дагаж мөрддөг нь бидний онцлог, давуу тал болж, манай багш, оюутнуудын харилцаа хандлага, ёсзүй, ухамсар, зан төлөвшилд эерэг нөлөө үзүүлсээр ирсэн. Манай сургуулийн төгсөгчид хөдөлмөрийн зах зээлд амжилттай ажиллаж, амжилт бүтээл дүүрэн байгаа явдал нь бид бүхний бахархам сайхан амжилт, ажлын маань бодит үр дүн, бидний сургалтын үйл ажиллагааны эцсийн зорилго биелж буйн тод илрэл мөн. Манай бүрэлдэхүүн сургууль нь сургалтын хөтөлбөрийн шинэчлэлийг Монгол улсын дээд боловсролын салбарын хөгжлийн бодлого, холбогдох хууль тогтоомж, үндэсний стандарт, дэлхийн нийтийн хөгжлийн чиг хандлага, нийгмийн хөгжил дэвшил, ОУУБИС-ийн дотоод дүрэм журамд нийцүүлэн тасралтгүй сайжруулан, хэрэгжүүлж буй хөтөлбөрүүдээ амжилттай магадлан итгэмжлүүлсэн болно. Манай сургуулийг сонирхон суралцах, хамтран ажиллах, харилцан санал солилцох, туршлага хуваалцах, хамтарсан төсөл, хөтөлбөр хэрэгжүүлэх, эрдэм шинжилгээ, судалгааны ажил эрхлэх, сургалт ба бусад олон талт арга хэмжээ зохион байгуулах чиглэлээр хамтрах сонирхолтой байгууллага болон хувь хүний өмнө манай сургуулийн үүд хаалга ямагт нээлттэй байдгийг уламжилж байна. Та бүхний юу санасан ёсөн цагаан хүсэл сэтгэлчлэн бүтэж, эрүүл энх байж, өөрийн салбартаа амжилттай ажиллаж, улс эх орныхоо хөгжилд хувь нэмрээ оруулж, сайн сайхан амьдрахын өлзийтэй ерөөлийг өргөн дэвшүүлье. Сайн үйл бүхэн түгэн дэлгэрэх болтугай.

Хүндэтгэсэн,

Маньбадарын ДОВУУЧ
Доктор Ph.D, дэд профессор